Greenland Airports-imi ukioq immikkuullarissoq

Nuummi nunanut tamalaanut mittarfik novembarip 28-iani ammarneranut atatillugu ukioq 2024 Greenland Airportsimut immikkuullarissimavoq.

Alloriarnermik pingaarutilimmik Mittarfik Kalaallit Nunaat tikikkuminarnerulersippaa , inuussutissarsialerinikkullu siuarsaaneq aammalu takornarialerinermi inerisaanermilu periarfissiilluni.

“Mittarfittaap aqqummik nutaaliaasumik Kalaallit Nunaat avammut attaveqalersippaa. Pisoq oqaluttuarisaanermi ilaavoq, nunalu tamakkerlugu iluaqutaassussaalluni” Pisortaq Jens Lauridsen oqarpoq. Tassungalu tunngatillugu erseqqissarpaa sulisut suleqatigisimasallu suliffeqarfik sinnerlugu suliamut tunniussilluarsimanerat.

Ukioq taanna suliffeqarfiup ilua aamma allannguutinik nalaataqarpoq, soorlu Greneland Airports Construction A/S aamma Greenland Ariports Regional kattuneqarnerat. Tassanilu Qaqortumi suliaqarnerup tungaatigut nalimmassarniarnikkut suliffeqarfiullu iluani suleqatigiinnermut naatsorsuutinut kinguneqartitsimavoq, suliap suli sanaartorneqarnera peqqutaalluni.

Saniatigulli Ilulissani Qaqortumilu sanaartornerit ingerlalluarput, sanaartornerat aammalu atortulersornerat pilersaarutit malippaat.

Mittarfiit tamarmik 2026-mi ammarnissai ilimagineqarput, tamannalu angallannikkut takornariaqarnikkut inuussutissarsiornikkullu pingaaruteqarput.