CEO-nngortussap misilittagallip Greenland Airports immikkoortumut nutaamut siuttuuffigissavaa

Kalaallit Nunaanni mittarfiit nutaat sananeqareernerisa kingorna Greenland
Airports-ip maannakkut suliassaq annertooq tulleq sammisussanngorpaa,
tassani aallussineq sanaartornermiit ingerlatsinermut, ineriartortitsinermut
aningaasarsiortitsilernissamullu sammitinneqariartuaartussanngorluni.
Taamaattumik siulersuisut Jeppe Jensen pisortaaninngortussatut ulloq 1.
november 2026 sulilertussanngorlugu toqqarpaat.

Nuummi aamma Qaqortumi Mittarfinni mittarfiit nutaat ammarneranni – aammalu
Ilulissani ammaasussanngornermi – Kalaallit Nunaanni silaannakkut angallannermi
piffiit nutaat toqqammavilerneqarput. Maannakkut aningaasaliinerni annertuuni
periarfissaqarfiit atulernissaannut aammalu periarfissat mittarfiit nutaat
periarfissiissutigisaasa ammaannissaannut sulineq pimoorullugu
aallartittussanngorpoq.

Suliassaalissapput aalajaatsumik isumannaatsumillu ingerlatsinerup qulakkeernissaa,
mittarfiit ineriartortinneqarnerisa ingerlateqqinnissaa aammalu angalasunut,
inuussutissarsiortunut inuiaqatigiinnullu sapinngisamik annertunerpaamik
naleqalersitsinissaq.

Suliassamut tassunga siuttunngortussatut siulersuisut Jeppe Jensen
pisortaaninngortussatut toqqarpaat. Jens Lauridsen, mittarfiit nutaat pingasut
sanaartorneqarnerannut ingerlanneqalernerannullu siuttuusimasoq, aammalu Ilulissani Mittarfiup ammarnerani isumaqatigiissutaa naasussaq, taarsertussanngorpaa.

Jeppe Jensen Kalaallit Nunaanni inuussutissarsiornermi misilittagaqarluni aqutsisutut
ilisarnaateqarpoq aammalu 2021-miilli KNI A/S-imi pisortaanerusimalluni.

Siusinnerusukkut Mittarfeqarfinni qullersaqarfimmi pisortaniissimavoq aammalu
Tusass-imi aqutsisutut atorfeqarsimalluni.

Alloriarnerup tullia pissusissamisoortoq

Siulersuisut siulittaasuannut Jens Willumsen-imut atorfinitsitsineq Greenland Airports
ip ineriartornerani pissusissamisoortumik nikittoqarneranut malunnartitsivoq.

“Greenland Airports pissusissamisoortumik allanngortitsisussanngorpoq. Ukiuni
kingullerni mittarfiit nutaat pilersinneqarnissaat sammineqarsimavoq, ukiuni aggersuni
isumannaatsumik ingerlatsinikkut, ineriartortitsinerup ingerlateqqinneratigut
tikikkuminarnerulersitsinikkullu taakkua periarfissaqarfiisa atorneqalernissaat
sammineqartussanngorluni. Suliassaq taanna allaavoq, taamaattumillu aqutsisussaq
eqqortunik misilittagalik eqqortunillu piginnaasalik immikkoortumi tassani
siuttunngortussaq ujartorsimavarput.”

Tikkuarpaa Jeppe Jensen-ip najukkanut annertuumik ilisimasaqarnera nunatsinnisuliffeqarfiit pingaarnersaasa ilaannit misilittagaqarneranut ataqatigiissitsisoq.

“Jeppe attaveqaasersuutinik inuiaqatigiinni pisariaqartinneqartunik aammalu
aaqqissuussaanerni annertuuni aqutsinermik annertoorujussuarmik misilittagaqarpoq.
Peqatigisaanik annertuumik niuernermik paasisimasaqarpoq, atorluarusutatsinnik.
Naatsumik oqaatigalugu ilisarnaatai Greenland Airports-ip suliffeqarfittut inuiaqatigiinni
pisariaqartinneqartutut, Kalaallit Nunaat tamakkerlugu periarfissanik suli
amerlanerusunik ammaassisussatut, ineriartortinnerani immikkoortup tullianut
tulluaqqissaarput.

Peqatigisaanik piffissaq iluatsillugu Jens Lauridsen annertoorujussuarmik
suliaqarsimaneranut qutsavigerusuppara. Nunanit tamalaanit mittarfinnik nutaanik
pingasunik sananissamut suliassatut aallartittoq, piffissap ingerlanerani Kalaallit
Airports-ip aamma Mittarfeqarfiit ullumi ilisimasatsinnut Greenland Airports-inngorlugu
kattunneqarnerat ilaatilerlugu ineriartorsimavoq kiisalu sanaartornermiit
ingerlatsinermut ineriartorsimalluni. Tamanna Jensip annertuumik tunniusimalluni
siuttuuffigisimavaa, suliaqarnerlu taanna toqqammavissaliivoq, tamannalu Jeppe-p
maannakkut inerisaqqittussanngorpaa.”

Suliassaq nunarput tamakkerlugu iluaqutaasussaq

Pingaartumik Greenland Airports-ip inuiaqatigiinni inissisimanera, Jeppe Jensen-ip
akuersiniarluni aalajangerneranut pissusissamisoortunngortitsivoq.

“Suliffeqarnera tamaat suliffeqarfinni inuiaqatigiinnut kalaallinut suliassanik
pingaarutilinnik suliaqartuni sulinissaq kajumigisimavara. Tamanna aamma Greenland
Airports-imut atuuppoq. Silaannakkut angallanneq inuiat naapissinnaanissaannut,
suliffeqarfiit ineriartornissaannut aammalu nunatta ataqatigiissinnaassuseqarnerata
qulakkeernissaanut pisariaqarpoq. Suliassap taassuma sulisut suleqatigisartakkallu
peqatigalugit suliarinissaanut qilanaartorujussuuvunga.”

Ilulissani Mittarfiup ammarnissaa pisussaq aamma immikkut
pingaaruteqalertussaavoq.

“Ilulissani inunngorpunga peroriartorlungalu, taamaattumik nunanit tamalaanit
mittarfittaassap tassani ammarneranut peqataanissaq soorunami
immikkuullarilluinnartussaavoq. Kisianni siullermik pingaarnertullu illoqarfimmut
aammalu Kalaallit Nunaat tamakkerlugu ulloq pingaaruteqartorujussuusussaavoq. Mittarfiit nutaat aammalu pioreersut siunissami ukiorpassuarni Kalaallit Nunaat
tamakkerlugu iluaqutaanissaannut qulakkeereqataanissara qilanaaraara.”