Nuummi Mittarfimmi angallannerup aqunneqarnerani allannguutit

Nuummi nunanit tamalaanit mittarfimmi nutaami piffissami angallaffiunerpaap siulliup kingorna Trafikstyrelsen aamma Greenland Airports timmisartumik angallannerup suliaqarfigineqarnera sukumiisumik naliliiffigaat.

Trafikstyrelsen-ip ingerlatsinissamut akuersissutaanut atugassarititaasut naammassiniarneranni kukkunerit naliliinermi ilaatinneqarput, taamaattumillu nalunaaquttap akunnerani timmisartunik suliaqarnerit qassit ingerlanneqarsinnaanerannut tunngatillugu maannakkut killilersuigallarnerit atuutsinneqalerput.

Nuummi ingerlatsinissamut akuersissutip naammassiniarneranut tunngatillugu kukkusoqarsimanera tamakkiisumik miserratiginngilarput.

Pisut ilungersunarput, aammalu – oqartussani aammalu mittarfimmik atuisut akornanni – tamatuma ernumalersitsisimanera paasisinnaavarput.

Erseqqissarusupparput pisimasut arlaalluunniit piaaraluni maleruagassanik malinninnginnermut imaluunniit akisussaaffimmik tigusinnginnermut takussutissaanngimmata. Silaannakkut angallannermut suliassaqarfik teknikkikkut pisariusuuvoq aammalu suleriaatsit piumasaqaatillu arlalippassuit maleruagassaqartinneqarlutik, kisianni nassuerutigisariaqarparput akisussaaffipput naammassisimanatigu. Tamanna akisussaaffigaarput.

Siulersuisut nutaat aqutsisullu pisut annertoorujussuarmik ilungersunartutut isigaat. Suliniuterpassuit aallartereerpagut, taakkualu aqutsisoqarfiup “findings”-iisa sukkasuumik sukumiisumillu iliuuseqarfiginissaat qulakkeerniarlugu, Trafikstyrelsen aamma Air Greenland qanimut pilersitsiviulluartumillu oqaloqatigalugit suliarineqarput.

Tamatuma saniatigut Greenland Airports-imi aqutsisut siulersuisullu Flight Safety-nik tamaginnik aammalu security-nut suliassaqarfimmik, ilanngullugu Safety Management-inut periaaseq tamaat, tamakkiisumik misissorneqarnissaannut pilersaarut suliaraat.

Siunnerfigaarput tatiginnilerseqqinnissaq aammalu piumasaqaatit tamarmik siunissami tamakkiisumik naammassineqarnissaasa qulakkeernissaa.

Timmisartuutileqatigiiffinnut, ilaasunut suleqatigisartakkanullu akornusiinerit akornusersuinerillu pisut malitsigisimasaat ajuusaarutigaagut.

Mittarfiup Kalaallit Nunaanni attaveqaasersuutinut ataqatigiissitsisinnaassuseqarnermullu pingaarutilimmik inissisimanera eqqumaffigilluinnarparput, aammalu sapinngisamik sukkanerpaamik aalajaatsumik ingerlalluartumillu ingerlatsinerup iluarseqqinnissaa siunnerfilimmik sulissutigaarput.