Greenland Airports-imi siulersuisunngortut

Immikkut ittumik ataatsimeersuarnermi Greenland Airports-imi siulersuisunngortut inuttalersorneqarnerat tamanut saqqummiunneqarpoq.

Jens Wittrup-Willumsen siulersuisuni siulittaasunngortussatut toqqarneqarpoq. Taamaalilluni Kjeld Zacho Jørgensen taarserpaa.

Siulersuisuni siulittaasunngortoq silaannakkut angallannermik angalatitsinermillu inuussutissarsiortuni aqutsisutut ukiorpassuarni misilittagaqarpoq, ilanngullugu SAS-imi pisortaanermut tullersortitut aammalu siusinnerusukkut Air Greenland-imi siulersuisuni siulittaasuusimalluni.

“Tatiginninneq piginnittup takutissimasaa tulluusimaarutigaara qujamasuutigalugulu. Greenland Airports nunatsinni attaveqaasersuutini qitiulluinnartumi inissisimavoq, aammalu ineriartortitsinerup ingerlaqqinnissaanut tapersiinissara qilanaaraara. Inuiaqatigiinnut inuussutissarsiortunullu periarfissaqarfiit annertoorujussuupput.”

Security-p sunniuteqarluartumik ingerlalluartumillu ingerlanissaa aammalu Nuummi mittarfimmi ingerlatsineq siulersuisut aqutsisullu qanittoq eqqarsaatigalugu annertuumik ukkatariniarpaat. Peqatigisaanik Qaqortumi Ilulissanilu mittarfissat pitsaasumik eqaatsumillu ingerlanneqalernissaat qulakkiissavarput. Suliassat taakkua – siulersuisunngortut aammalu suliffissuarmi sulisorpassuit pikkorissut peqatigalugit – annertunerusumik aallartinnissaat qilanaaraara,” oqarpoq Jens Wittrup-Willumsen.

Siulersuisunngortut tamatuma saniatigut tassaapput:

Anni Thøgersen, ilaatigut Københavnip Mittarfianit niuernikkut ineriartortitsineq immikkut ukkataralugu ukiorpassuarni misilittagaqartoq.

Anette Grønkjær Lings, ilaatigut Visit Greenland-imi siulersuisuusimanerminit Kalaallit Nunaanni inuussutissarsiornerup takornariartitsisarnerullu ineriartortinneqarnerannut annertumik ilisimasaqartoq.

Kristoffer Plenge-Brandt, driftsdirektør i Københavnip Mittarfiani ingerlatsinermut pisortaq, ukiut 17-it sinnerlugit misilittagaqartoq aammalu mittarfimmik ingerlatsinermi paasisimasaqartoq.

Siulersuisunut siulittaasutut tunuartoq Kjeld Zacho oqarpoq:

“Greenland Airports-imut aammalu Kalaallit Nunaata oqaluttuarisaanerani attaveqaasersuutinut suliniutit pingaarnersaasa ilaanni siuttutut inissisimaneq ataqqinaataasimavoq. Kalaallit Nunaanni innuttaasunut, siuariartortitsinermut aningaasaqarnermullu pingaaruteqarnera ingasattajaarlugu oqaatigineqarsinnaagunanngilaq.

Mittarfeqarfiit aamma Kalaallit Airports-ip Greenland Airports-inngorlugu kattunnerat aamma suliassaasimavoq annertoorujussuaq, sapiissuteqarnissaq annertuunillu aalajangiinissaq pisariaqarsimallutik.

Siulersuisuni tunuartut, aqutsisut minnerunngitsumillu sulisut ullut tamaasa ingerlatseqatigiiffimmut tunniusimallutik suliaqarlutik ilungersorlutik sulisut qutsavigerusuppakka aammalu suleqatiginnermut nuannerluinnartumut qujallunga.