Greenland Airports-ip aamma Naviair-ip Nuummi timmisartunik aqutsinermut aaqqiissutissaq pillugu isumaqatigiissut atsiorpaat

Aaqqiissutissaq nutaaq taanna 2026-mi maajimi ingerlanneqalissasoq naatsorsuutigineqarpoq aammalu pisinnaasani killilersuinerit Trafikstyrelsen-ip septembarimi atuutsiligai kivittussaallugit.

TMA atorlugu aaqqiissutissami silaannakkut angallanneq sunniuteqarluarnerusumik iliuuseqarfigineqartalissaaq, tassami siunissami timmisartumik angallanneq AFIS-imi sulisunut anngutinnginnerani, sumiiffimmi nassuiarneqartumi timmisartunut aqutsisunit aqunneqartalissammat.

Jens Lauridsen, Greenland Airports-imut CEO, oqarpoq:

“Isumaqatigiissut manna siunissamut aningaasaliineruvoq. Timmisartunik aqutsinermut aaqqiissutissaq nutaaq taanna Nuummi Mittarfimmi siuariartortitsinissamut sunniuteqarluartumillu ingerlatsinissamut annertuunik toqqammavissaliivoq. Naviair-ip piginnaasaqarfii tatigisorujussuuagut aammalu suleqatigilluarnissaa qilanaaraarput.”

TMA Nuummi Naviair-ip timmisartunut paasissutissiisarfiani (FIC) pilersinneqassaaq, taamaalillunilu Naviair-ip Kalaallit Nunaata silaannartaani appasinnerusuniittuni isumannaatsumik sunniuteqarluartumillu silaannakkut angallannermi sullissinermik pilersuinermi inissisimanera atuutereersoq qitiusorlu inerisaqqinneqassalluni.

Anders Rex, Naviair-imut CEO, nangippoq:

“Silaannartamik atuisunut aammalu inuiaqatigiinnut kalaallinut iluaqutaasumik Nuummi Mittarfimmi siunissami angallannerup ingerlaneranut tapersiisinnaagatta nuannaarutigisorujussuuarput. Naviair ukiorpassuarni Kalaallit Nunaanni silaannakkut angallannermut sullissisimavoq, aammalu Greenland Airports-ip suleqatigilluarnerata ingerlaannarnissaa ineriartornissaalu qilanaaraarput”.

Kalaallit Nunaanni silaannakkut angallannermi attaveqaasersuutinik nutarterinermi alloriarneq pingaaruteqartoq isumaqatigiissummi malunnartinneqarpoq aammalu siunissami ilaasut amerliartornissaannut sinaakkutissat pitsaanerulersinneqarlutik.