Timmisartunik aqutsinermut aaqqiissutissaq nutaaq suliniutigineqarpoq

Aalajangiinerup tungavigaa Nuummi mittarfimmi silaannakkut angallannerit aqunneqannginnerisa kingunerisaanik killilersuutit atuutsinneqalersimaneri. Tassanilu unammillernarsimasut peqqutaallutik septembarimi Trafikstyrelsen-imiit killilersuutit atuutsinneqalerput, timmisartut akunnerup ataatsip iluani missinnaasut killilersorneqalerlutik. Taamatut killilersuuteqalerneq angalasunut inuussutissarsiortunullu sunniuteqarsimavoq.

Air Greenland aamma Trafikstyrelsen qanimut oqaloqatigalugit TMA-model toqqarneqarpoq, aammalu Naviair-imut pilersitsinissap ingerlatsinerullu isumaqatiginninniutigineri naammassilerparput. Naatsorsuutigaarput juullertinnagu isumaqatigiissut inissinneqassasoq.

TMA sunaava?

TMA mittarfiup qulaani “silaannartami karsitut” nassuiarneqarsinnaavoq, tassani mittarfimmut qaninnerusumi AFIS-ini sullissisunut timmisartut tunniunneqannginneranni, timmisartunut aqutsisut angallanneq aqussallugu. Siunertaavoq angallannerup sunniuteqarluarnerusumik ingerlanissaata qulakkeernissaa.

Nuummi qulaani silaannaq ullumikkut marloqiusamik immikkoorpoq:

• Silaannaq qulleq – 6 kilometeri miss. qulaallugu – timmisartunik aqutsisunik Islandimiit aammalu Canadamiit aqunneqarpoq. Tassanilu nunat assigiinngitsut akornanni timmisartuussineq aqunneqarluni.
• Silaannaq alleq – 6 kilometeri miss. Ataallugu – Silaannaq aqunneqanngitsumik taaneqarsinnaavoq. Tassanilu timmisartortartut iluminni NAVIAIR-ip paasissutissat tunniussai naapertorlugit attaveqaqatigiillutik qanillivallaannginnissartik nakkutigalugulu akisussaaffigisarpaat.

TMA atuutsinneqalernerani silaannaq allermut aaqqiissuteqassaaq – Nuup eqqaani timmisartunut aqutsisunik ingerlanneqalissalluni.

Aaqqiissutissap Nuummi massakkut killilersuutigineqartut, taassaasut timmisartut akunnerup ataatsip iluani angalasinnaasut killilersorneqarneri atuutsikkunnaassavai. Angallanneq aalajaannerulissaaq aammalu angalasunut inuussutissartiutilinnullu eqaannerusumik ingerlatsisoqarsinnaanngussalluni. Tamannalu nuummi silaannakkut angallanneq siunissamut qularnarunnaalissalluni.

“Maannakkut aaqqiissutissaq angallannermi killilersuinernik kivitsisinnaasoq aammalu Nuummi silaannakkut angallannermut siunissamut qulakkeernissaanut naammassilluinnalermat naammagisimaartorujussuuarput. TMA-modelip angallannerup annertusiartortup iliuuseqarfiginissaanut pisariaqartunik pisinnaasaqartilissavaatigut isumannaatsuutissallutalu, aammalu sapaatit akunnerini aggersuni isumaqatigiissutip inissitsinnissaa qilanaaraarput, tassanilu annertunerusunik nalunaaruteqassaagut”, Greenland Airportsimi CEO, Jens Lauridsen, oqarpoq.

Naatsorsuutigaarput TMA-mi aaqqiissutissaq 2026-mi aasartinnagu ingerlanneqalersinnaassasoq.