Timmisartunik aqutsinermi aaqqiissutissap nutaap Nuummi Mittarfik angallattoqarnerulernissaanut piareersartippaa

Timmisartunik aqutsinermi aaqqiissutissap nutaap Nuummi Mittarfiup qulaani silaannermi atorneqalernissaa Trafikstyrelsen-ip akueraa, aammalu mittartut aallartartullu amerlassusissaannut maannakkut killilersuinerit kivinneqariartuaarnissaat naatsorsuutigineqarpoq.

Akuersissuteqarnermi Nuummi Mittarfiup silaannartaani sumiiffik killilersugaasoq– taaneqartartoq Terminal Maneuvering Area imaluunniit TMA-ginnartut taagorneqartoq – pilersinneqassaaq, tassani timmisartunut aqutsisut mittarfimmut mittarfimmiillu timmisartumik angallanneq alapernaarsussallugu nakkutigissallugulu.

Siunissami mittarfimmut mittarfimmiillu timmisartumik angallanneq Nuummi Naviair-ip timmisartunut paasissutissiisarfianiit timmisartunut aqutsisunit suliaqarfigineqassaaq. Timmisartunut aqutsisut  Nuummi Mittarfimmi AFIS-imi sullissisut, aallarnernut minnernullu atatillugu mittarfimmut qaninneruneranni timmisartortartunut siunnersuisussat paasissutissiisussallu, qanimut peqatigalugit sulissapput.

Greenland Airports-imut akuersissuteqarneq Nuummi Mittarfimmi sunniuteqarluarnerusumik angallannerup ingerlatinnissaanut suliaqarnermi alloriarneruvoq pingaaruteqartoq. Timmisartunik aqutsinermut aaqqiissutissami nutaami tassani mittarfiup ammasarfii malinneqassapput, taamaalillunilu 06:00-miit 21:00-mut nalinginnaasumik ammasassalluni. Tassaniipput angallannerup annertunerpaaffiani ulloq unnuarlu nalunaaquttap akunneri.

Timmisartunik aqutsinermut aaqqiissutissap nutaap pilersinneqarnerani Nuummi Mittarfimmi mittartut aallartartullu amerlassusissaannut maannakkut killilersuinerit kivinneqariartuaassasut naatsorsuutigineqarpoq. Tamanna atortup nutaap taassuma silaannartap iliuuseqarfigineqarnerani misilittagaqarfigilernera ilutigalugu pissaaq.

“Timmisartunik aqutsinermut aaqqiissutissap nutaap atulernerani Nuummi Mittarfimmi angallannerup patajaannerusumik sunniuteqarluarnerusumillu iliuuseqarfiginissaanut nukittunerusunik tunngavissaqalissaagut,” oqarpoq Mie Rajcic, Greenland Airports-imi ingerlatsinermut pisortaq.

”Tamanna mittarfiup ammanerani angallannerup ingerlatinnissaanut pitsaanerusunik tunngavissaqalersitsivoq, peqatigisaanillu Nuummi ingerlatsinerup ineriartorteqqinnissaanut alloriarnerulluni pingaaruteqartoq,” nangippoq.

TMA ingerlanneqalissaaq sisamanngorneq ulloq 14. maj 2026 nunatsinni nalunaaqutaq malillugu nal. 06:00 aammalu Greenland Airports-ip, Naviair-ip aammalu Trafikstyrelsen-ip akornanni qanimut suleqatigiinnerup kinguneralugu.