Isumannaallisaanermi misissuisarneq

Isumannaallisaavik

Greenland Airportsimi mittarfik sorleq aallarfigilernerit apeqqutaalluni, qaffasissutsini assigiinngitsuni pingasuni isumannaallisaanermi misissuisarpugut. Matumani suut eqqumaffigissanerlugit takusinnaavat, taamaasillutit ilorrisimaartumik toqqissisimasumillu angalasinnaassallutit.

Imatut isumannaallisaavikkuussaatit

Nunanut allanut angalalernerit tamarmik isumannaallisaavikkoorlutik aallartitarput.

Mittarfeqarfitsinnut apuukkuit aqqusaagassatit ilitsersuulluarumaarpatsigit.

Matumani periaaseq aallariartorluarnissarnullu siunnersuutit tamakkiisumik paasisaqarfigisinnaavatit.

Makkua timmisartup iluanut nassatarniiteqqusaanngilluinnarput

Nunap iluani imaluunniit nunanut allanut angalasussaanersutit apeqqutaatinnagu, timmisartup iluanut nassatarni makkua nassanngisaannassavatit:

Aallaasit allallu aqerlunik igeriarnissamut atorneqartussat
Elektrochokapparatit
Inngigissut aamma ipittut (annerpaamik 6 cm)
Sakkut
Sakkut nipeqanngitsut
Qaartiterutissat aamma ikuallassinnaasut savequtit atortui
Allat timmisartup isumannaatsuunissaanut navianartorsiortitsisinnaasut

Qaqugu mittarfimmeeriissavit?

Inassutigaarput piffissaqarluarlutit takkutissasutit, tassami isumannaallisaavikkoorneq piffissani ulapaarfiusuni sivisunerusinnaasarmat.

Nuummiit angalaniaruit, kingusinnerpaamik aallarnissaq nalunaaquttap akunnerinik marlunnik sioqqullugu mittarfimmeeriissaatit. Mittarfitsinnit allanit qulimiguulinnullu mittarfitsinniit angalaleruit, aallarnissaq nalunaaquttap akunneranik ataatsimik sioqqullugu takkutereersimasariaqarputit.

Ornitassat apeqqutaalluni check-in piffissani assigiinngitsuni matusarpoq – timmisartuutileqatigiiffiup inassuteqaatai takukkit.

Piffissat takkutereerfissat pillugit inassuteqaatigut pillugit annertunerusut atuakkit uani.

Boardingkortit piareersimatiguk

Nuummi mittarfimmi isumannaallisaavikkoorsinnaanissarnut speedgate atussavat, tassani boardingkortit scannissallugu.

Mittarfinni allani boardingkortit isumannaallisaanermi sulisunut takutissavat.

Boardingkortit piareersimateriissavat – oqarasuaaterni imaluunniit pappialanngorlugu – taamaalillutit sukkasuumik ingerlaqqissinnaassallutit.

Saviminernik malugisaatikkoorneq

Pigisatit bakkinut inissereerukkit, saviminernik malugisaatikkuussaatit.

Timerni imaluunniit kaasarferni saviminertalinnik peqarnersoq saviminernik malugisaatip malugisarpai. Saviminertalinnik tigummiaqaruit, taakkua bakkimut inississavatit ingerlaqqissallutillu.

Scannerineq misissueqqittarnerlu

Saviminertalinnik tigummiaqanngikkaluartutilluunniit immikkut misissuiffigineqartussatut nalaatsortumik toqqagaasinnaavutit.

Algoritme atorlugu toqqaaneq pisarpoq, taamaattumillu nalaatsorluinnartumik pisarluni. Toqqagaasimaguit, isumannaallisaanermi sulisut nammineerlutik scannissavaatsit. Meeqqat aamma toqqarneqarsinnaapput, taamaattumik angalaqatigiilerussi meeqqat tamatuminnga piareersartissavat.

Illit imalluunniit meeqqat misissuinermi toqqissisimanasi misigisimagussi, sulisut ikioqqullusi qinnuigisinnaajuaannarpasi.

Nuummi akunnillutit mikkuit, isumannaallisaavikkuussaatit

Nunap iluani angalaguit Nuummilu akunnillutit mikkuit, isumannaallisaavikkooqqaassaatit. Taamatut suleriaaseqarneq ilaasut tamarmik isumannaallisaanermi malitassat pisussaassutsimik qulakkiissavaat, tamannalu timmisartuussineq qaffasinnerusumik isumannaannerusumik toqqissisimasumillu angalanissat qulakkiissavaa.

Imatut paasillugu, Nuummi akunnillutit mikkuit, tikittunut isaariaaniit qummukaqqaassaatit aallariartortarfikkooqqaassaatit, isumannaallisaanermilu misissuisarfik aqqusaaqqaariarlugu aatsaat timmisartumut ilaaffissarnut utaqqiartorlutit aallariartortunut inersuarmut ammukaqqissasutit.

Nuummiit aallartussaaguit

Tamatigut isumannaallisaavikkoortartussaavutit – nunap iluani angalanersutit, Nuummi akunnillutit minnersutit imaluunniit nunanut tamalaanut timmisartorniarnersutit apeqqutaatinnagu.

Nuummi isumannaallisaavik nutaaq nutaaliaasunik atortoqarpoq, sulianik ingerlatitsineq sukkanerulerluni ajornannginnerulerlunilu.
Isumannaallisaavikkoortussanngornerni atortut elektroniskiusut imaluunniit imerpalasut taskerniit amusariaqanngilatit.

Nuummi mittarfimmiit nunanut tamalaanut angalasussaaguit eqqumaffigissavatit:

Ornigassarnut tikinnerni nassatanik tunniussisarfimmut toqqaannartumik ingerlatinneqassaatit.
Timmisartumut allamut ilaallutit ingerlaqqittussaaguit, isumannaallisaavikkooqqissaatit.

Ornigassarnut tikinnerni utaqqisarfimmut isersinnaassanngilatit, kisianni toqqaannartumik nassatanik tunniussisarfimmukartinneqassallutit. Taamaattumik duty free-nik pisiniarniaruit, angalanissavit aallartinnginnerani Nuummi duty free-nut pisiniarfitsinni nutaami pisiassaqarluartumilu tamanna iluaqutaasumik pisinnaavoq.

Ornigassarnut tikereernerpit kingorna angalanerit timmisartumut allamut ilaallutik ingerlaqqittussaappat, utaqqisarfimmukarsinnaalernissanut aammalu timmisartumut ilaaffissarnut ingerlaqqissinnaalernissarnut isumannaallisaavikkoornissaq pisariaqarpoq.

Kangerlussuarmiit, Ilulissaniit Narsarsuarmiillu, Nerlerit Inaanniit, Kulusummiit nunanut allanut angalasussaaguit

Nunanut allanut timmisartortussaaguit, isumannaallisaavimmi pigisat aalajangersimasut timmisartup iluanut nassatassarniit qaqittussaavatit.

Atortut elektroniskiusut annertunerusut (qarasaasiat angallattakkat, tablets, assiliiviit, oqarasuaatit angallattakkat).
Imerpalasut puussianik 1-literini matoqqinneqarsinnaasuni akimullu ersittuniitinneqassapput (annerpaamik puussiami ataatsimi 100 ml).
Qaatigut atisat kaasarfimmiullu (matuersaatit, aningaasat, qiterutit il.il.).
Ikittaatit immikkoortillugit inissinneqassapput.

Mittarfiit sinneriniit aallartussaaguit

Kalaallit Nunaanni mittarfiit allat taamaallaat nunap iluani timmisartunik sullissisarput. Tamatuma kingunerisaanik taakkunani security-mi misissuisoqartanngilaq. Taamaattoq timmisartup iluanut nassatarni suut nassarneqarsinnaanerannut maleruagassat eqqumaffigissavatit.

Imerpalasut qanoq annertutigisut nassaqqusaavigit?

Imerpalasut ataaseq annerpaamik 100 ml-imi pooqartillugu aatsaat nassaqqusaapput.

Puui tamarmik akimut ersittuussapput, matoqqinneqarsinnaassapput puussiamilu 1-literimiissallutik. Puussiaq ataasiinnaq nassarsinnaavat.

Suut imerpalasutut isigineqarpat?

Imerpalasuni imeq aamma imeruersaatit kisimik ilaatinneqanngillat, kisianni aamma:
Quligut, tarngut, tipigissaat aamma kigutit qaqorsaataat.
Nutsanut gelé, deodorant, cremit aamma palersaat.
Pinnersaatit imerpalasut (ass. foundation, lipgloss aamma mascara).
Nerisassat imerpalasut imaluunniit kinertumik imallit (ass. yoghurt, marmelade aamma honning).

Ilaatinneqanngitsut – suut nassaqqusaavigit?

Imerpalasut makkua annertunerusumik annertussuseqartillugit nassaqqusaapput, kisianni isumannaallisaavimmi misissorneqassallutik:

Meeraaqqat nerisassai aamma immuk milutsitassaq angalanermi atorneqartussat.
Nakorsaatit (imerpalasut aamma iisartakkat) – eqqaamajuk pisariaqarpat recepti imaluunniit uppernarsaat.
Inuit immikkut pisariaqartitsisut nerisassaat.

Imerpalasuutitit imatut poortussavatit

Isumannaallisaavikkuunnginnarni imerpalasut tamaasa puussiami 1-literimi inississavatit.
Puussiaq nassatarniit amussavat aammalu scannerisarfimmut anngukkuit bakkimut inississallugu.
100 ml sinnerlugu imerpalasuuteqaruit (ilaatinneqanngitsut akornanniinngitsut), taakkut nassatani tunniunneqartussani inissinneqassapput.

Imerpalasunik annertuallaanik peqaruit susoqassava?

Poorineqartut 100 ml-imit anginerusut, timmisartup iluanut nassatassaniitillugit nassaqqusaanngillat.

Imerpalasut annertunerusut taskerniittut peernissaat puiorsimagukku, isumannaallisaanermi sulisut taakkua igissavaat.

Ornigassarnut ilanngaaserinermut maleruagassat misissukkit

Eqqaamajuk imerpalasunut maleruagassat ornitassat apeqqutaalluni assigiinngissinnaapput. Nalorniguit, nunami angalaffigisassarni ilanngaaserinermut maleruagassat misissussagitit inassutigaarput.

Bussinik, taxanik biilinilluunniit

Nuummi timmisartoqarfimmut aamma timmisartoqarfimmiit bussit ingerlasarput, bus 3 aallariartortarfik/tikittarfik saneqquttarpaat.

Atuaruk