Henrik Estrup Greenland Airports-imi ingerlatsinermut pisortatut atorfimminit soraarpoq.

Kalaallit Nunaanni mittarfinnik ingerlatsinermik ineriartortitsinermillu suliaqarnermi ukiorpassuarni qitiusumi inissisimasimavoq, siullermik Mittarfeqarfinni pisortaanertut, tamatumalu kingorna ingerlatseqatigiiffimmi nutaami ingerlatsinermut pisortatut.

– Kalaallit Nunaanni attaveqaasersuutini qitiusut ilaannik suleqatit pikkorissut peqatigalugit ineriartortitseqataanissamut aammalu suliassat ajornakusoortut pissanganartullu suliarinissaannut periarfissaqarsimagama nuannaarutigaara. Taakkua aammalu Greenland Airports siunissami pitsaanerpaanik kissaappakka, oqarpoq Henrik Estrup.

Aqutsisuni inissisimasuni suleqatigiittussatut inissisimasut allanngortinnissaannut piffissaallualinngisaannartoq, Jens Lauridsen, Greenland Airports-imi pisortaanerup oqaatigaa.

– Kisianni maannakkorpiaq Nuummi Mittarfiup ammarnissaata aammalu Ilulissani Qaqortumilu mittarfittaassat ammarnissaannut piareersarnerit akornanni ikaarsaariarfimmiippugut. Tamanna nallukattat aalannissaannut periarfissiivoq. Tassani mittarfiit ingerlanneqarneranni nukittunerusumik niuernermik ukkatarinnissinnaasoq siunissami pisariaqartinneqalertussaavoq,” oqarpoq Jens Lauridsen.

– Henrik ukiorpassuarni misilittagaqarluni, annertuunik ilisimasaqarluni tunniusimallunilu Kalaallit Nunaanni mittarfinnik ingerlatsinerup ineriartortinnerani pingaarutilimmik inissisimasimavoq. Suleqatigilluarsimanitsinnut annertuumillu suliaqarsimaneranut qutsavigerusuppara, nangippoq.

Ingerlatsinermut immikkoortortaqarfimmi aqutsineq piffissami ikaarsaarfiusumi Jens Lauridsen suleqatigalugu pisortamit misilittagalimmit Niels Grosen-imit isumagineqassaaq.